Sunday, August 7, 2016

قلم و اتكسر


صار لك سنة لا بتكتب و لا بتنبش
صابك صدأ و لا الخمول جواك عشش
خايف يا قلم تكتب ولا حبل الفكر اتقطع
ولا وحي السما عن قلبك اتمنع


سن القلم إتقصف و ما عادش ليه قيمة
و ما دام صابه الصدأ ما بقاش له شكيمة
قاموا يغسلوا ويكفنوا و يدفنوا
قلم كان له في يوم مستقبل و له هيبة


قلم و اتكسر مات و اندفن
إتنسى في ماضي محدش سأل فيه
فوق الرفوف العتة نخرت فيه
نصبوا له صوان لجل يعزوا فيه
فجأة قام من تربته و القوة دبت فيه


كأنه رافض القيود رافض الموت
قام من غفوته يصرخ بعلو الصوت
أنا اللي كنت في يوم على العدو مسنون
و في وصف الحب كتبت على كل لون
و في حب بلدي كنت أنا مجنون




قلم عايز يكمل صولاته و جولاته
و فوق حروف الورق يتم غزواته
قلم صامد رغم ظروف القمع
ضد الهوى محايد ما يخيب في يوم ظن
قام صرخ صرخة اجتمع وراها الجمع
مستني فرصة جديدة عشان يسطع و يلمع

No comments:

Post a Comment