Wednesday, October 22, 2014

ورقة و قلم

بكتب اللي فيه القسمة و اللي يجي في البال

لا قولت على نفسي شاعر و لا قولت أنا فنان 

سلاحي هو قلمي بكتب و أعبر بيه

و الارض دي ساحتي و السما دي الوانـــــــي

 

و لو يوم هبطل اكتب

يبقى باب الوحي اتقفل

او بحر الكلم شطب

أو قلمي أصابه الخجل

عبر دايما بكلمة

ممكن في يوم تكون

عبرة لمن يعتبر 

أو غنوة في بحر الزجل


الكلمة سلاح فتاك

تحقق باسمه السلام

او تبتدي بيها عراك

خراب و دمار الوان 

او تزرع بيها قيمة

تدوم طول الزمن 

او تحفر في الصخر بيها 

للكبار و الصغار علام 


ورقة و قلم 

هو كل اللي تحتاجه عشان تكتب نغمة 

ممكن تحقق بيهم حلم أو تنشر فرحة

ممكن تكتب جواب يسافر لأحبابك

و بخط إيديك أكيد الفرق واضح قدامك

ممكن تسافر بأحساسك و تكبر بأحلامك

ممكن تزور العالم و أنت قاعد في مكانك

ممكن تجوب المشاعر و تسافر في الأرواح

ممكن تهز العالم و تبقى الحدث في كل صباح

ممكن تكون كتير بس أنت خد قرار

و مدام ده قرارك يبقى لك الأختيار

اكتب على ورقة بقلمك أو حتى سيب شخبطة

بكرة يكون فن يجيب للناس لخبطة

ورقة و قلم شيء بسيط و له قوة يجهلها الجاهل

فتش عن الورقة و أعقلها لو عاقل


ورقة و قلم





No comments:

Post a Comment