Saturday, October 5, 2013

بعد الطريق - رواية على رصيف الحب!!


وقت الغروب .... وقت الرحيل
جه بسرعة .. و مفيش بديل
تمشي في طريقك ... وأمشي في طريق
و بين كل خطوة و خطوة ...إحساس غريب
بيربط خطاوي الرحيل

وقت الغروب
و شمس دهبي بتختفي و تغيب
و معاها حبي ليك يا أقرب حبيب
كتبنا وقتها نهاية حبنا
نهاية عصرنا
و بكرة بعد الفجر بداية عصر جديد

وقت الرحيل
سبت إيديك و سبت إيديا
و إتفقنا بعدها مفيش مرة تانية
و إن ده آخر لقاء بيني و بينك
و بكرة أحلى بالنسبة لنا من غيري و من غيرك
و كل واحد من النهاردة قرر يبقى له طريق
و كأن قبل اليوم ده ما كانش لينا طريق
مجمعنا أنا و انت
و موحد قلبنا أنا و انت
بس النهاردة الطريق بقى له نهاية
و إفترقنا وإنتهت على الطريق الحكاية
و بقت حكايتنا قصة قديمة على ورق
يمكن تكون في يوم مطبوعة في رواية
رواية على رصيف الحب
على رف القلب مركونة مالها استخدام
دبلت في شمس الصيف و سقطت في الخريف
بس مع الربيع مالهاش ميلاد جديد

روايتنا .. قصتنا .. حكايتنا
رواية على رصيف الحب
قصة كتبها قلبين
و حكاها قلبين
و نهايتها فراق و غيم

No comments:

Post a Comment