Tuesday, May 21, 2013

يأسك وصبرك بين ايديك وانت حر

يأسك وصبرك بين ايديك وانت حر

عايش حياتك رجل برة ورجل جوة سايقها مر

فتح عنيك تلقى حواليك عبر كتير

و مش بس كلمتين هيغنوا عنك كل شر

 

دي حاجات كتير و من الضمير ادينا بنقرب

تفرق كتير و لو يوم تميل ادينا بنجرب

الدنيا ايه غير كام يوم وليل و ناس كتير

و احنا في طاحونة و ساقية دايرة عايشين بنتغرب

 

علي الطموح ده مافيش سطوح ولا سقف لاحلامك

علي الصوت ده مافيش سكوت و بص قدامك

شايف عنيك بتغيب عن الحقيقة و عن الطريق

بس و لو يوم فلحت ما تجيش تقول انك ملك زمانك

 

قطر الحياة ثابتة خطاه و المكتوب هاتشوفه

تروح يمين تحود شمال كله بيجري في صفوفه

و انت يادوب عابر سبيل و القطر ده وسيلة

وناس بتهرب بس فين تحت قضبانه و تروسه

 

ليه قررت تيأس قبل ما تحاول تفكر

مستني ايه عشان تبدأ طمعان في ايه اكتر

شايل حياتك على كفك و محتاس يا عيني

و ترجع تقول في الاخر مكتوب و متقدر

 

ايوة القدر مكتوب بس انت اللي بتختاره

و كل واحد فينا عايش سيد قراره

قرر تكون الاحسن و الأفضل بين الناس

و أهو كل واحد فينا مكمل في مشواره

 

انت الضمير و انت الحقيقة بس حاسك ليه خايف

قوي طموحك و معاك دليل و لازم تكون شايف

و لو يوم تكون وحدك ماشي على الطريق

ما تنسى ربك و اذكره دايما هو اللي عارف

 

No comments:

Post a Comment